ڈاکٹر منیر الدین احمد

ہیمبرگ ،جرمنی

افسانہ نگار

 ڈاکٹر منیرالدین احمد کا تعلق گاؤں چنگا بنگیال، تحصیل گوجرخان (پاکستان) سے ہے۔ وہ 22 نومبر 1934 کو راولپنڈی میں پیدا ہوئے۔ ابتدا میں اُن کا نام محمد یحیٰ رکھا گیا، لیکن بعد ازاں پیر مشورے سے “منیرالدین احمد” رکھا گیا۔ 1979 کے بعد سے انہوں نے یہی نام قلمی شناخت کے طور پر اختیار کیا۔ وہ ابتدا میں “یحیٰ فضلی” کے نام سے افسانے لکھتے رہے۔ان کے دادا، مولوی محمد فضل خاں چنگوی، ایک جید عالم اور مصنف تھے جنہوں نے متعدد علمی کتب تحریر کیں۔ دادا کی نادر کتب پر دسترس حاصل کرنے کے لیے منیرالدین احمد نے پنجاب یونیورسٹی سے مولوی فاضل اور گریجویشن کی ڈگریاں حاصل کیں۔ ان کا فکری سفر مذہبی مباحث سے شروع ہو کر تعلیم، سیاست، تاریخ، فلسفہ اور ادبیات کے میدانوں تک پھیل گیا۔1960 میں وہ جرمنی گئے، جہاں ہمبرگ یونیورسٹی سے 1967 میں ڈاکٹریٹ کی ڈگری حاصل کی۔ ان کا تحقیقی مقالہ اسلامی نظام تعلیم سے قبل 450 سالہ تعلیمی روایت پر تھا۔ بعد ازاں وہ ہمبرگ یونیورسٹی میں تدریسی فرائض انجام دینے لگے اور جرمن نیٹ انسٹی ٹیوٹ کے ریسرچ فیلو بھی رہے۔منیرالدین احمد نے افسانہ نگاری، ترجمہ نگاری، نثر، تحقیق اور تدریس کے میدان میں گراں قدر کام کیا۔ پاکستان میں ان کے 15 افسانے، جب کہ جرمنی میں مزید 50 افسانے تخلیق ہوئے۔ ان کے ادبی مرشد شیر محمد اختر تھے۔انہوں نے کئی اہم جرمن ادیبوں کی تخلیقات کو اردو میں منتقل کیا، جن میں کافکا، بریشٹ، سٹیفان اندرس، اور ایربش فریڈ شامل ہیں۔ ان کے نمایاں تراجم اور تصانیف میں شامل ہیں:

تراجم:

1۔جیون سائے (ایربش فریڈ کی 100 نظموں کا اردو ترجمہ)

2۔میں اسے ڈھونڈتا پھرا (10 جرمن شعرا کی نظمیں)

3۔جرمن افسانوی ادب کا انتخاب

4۔جرمن معاصر ادب

5۔دوری سائے

6۔پیٹر نجسلی کے خطبات و افسانے

تخلیقی ادب:

1۔زرد ستارہ

2۔ بنتِ حرام

3۔شجرِ ممنوعہ (جس میں “نثرانے” جیسی انوکھی صنف شامل ہے)

4۔بچھڑی ہوئی گونج

5۔حدیثِ باراں

تحقیق:

1۔اسلامی نظامِ تعلیم (انگریزی، زیورخ سے شائع شدہ)

2۔مولوی محمد فضل خاں ایک عالم ربانی کی سوانح حیات

منیرالدین احمد نے اپنے دادا کی سوانح عمری لکھنے کا عزم محض 12 برس کی عمر میں کیا تھا، جسے نصف صدی بعد مکمل کیا۔ ان کے ادبی کام کا دائرہ محض ادب تک محدود نہیں بلکہ بین الثقافتی مکالمے، ترجمہ، اور تعلیمی تحقیق تک پھیلا ہوا ہے۔

۔۔۔۔۔۔۔۔۔۔۔۔۔۔۔۔۔۔۔۔۔۔